现代文明社会，婚恋自由，要爱情又要面包，择偶标准肯定系睇重人品、家底、学识啊噉，只要你嘅爱女，唔系揾咗个恶贯满盈、穷到燶穷到贴地嘅男友，两个人几夹下，你通常都唔会搏命棒打鸳鸯啦。
但系，喺旧阵时，就唔系噉讲嘞。以前，厚街佬对仔女婚姻嘅掌控好紧要嘎。家中有女初长成，待字闺中，做父母嘅变身紧张大师嘎啦，“冇人问”，又惊死个女嫁唔出，知道个女有啲“*头*脑”嘞，“揾到”就更加肉紧，又担心个女冇带眼识人，一旦盲中中蚀底畀人，跟错人就大剂嘞。
于是乎，查家宅，将对方起底，就必不可少啦。个男仔姓乜名乜、住喺边窟，老窦系边个、做乜*工种，屋企几多兄弟姊妹、有几间屋大唔大，都会一一调查清楚。因为，喺老一辈嘅心目中，婚姻决定命运，对方系何方神圣、咩来历、咩出身，一定要清清楚楚，唔系嘅话，点敢放心将个女交畀人啊？分分钟畀人卖咗都唔知系咩一回事啊。
揾对象，绝对唔系睇个样嘅。旧阵时查家宅，第一点就系要睇下对方系边度人，地域因素就系要首先考虑嘅。啲家长惗住：辛辛苦苦养大个女，梗系希望佢嫁得好嫁得安乐啦，“大村乡”同“村仔”相差好远嘅啵，嫁咗“大村乡”，村场好，生活好，就唔使捱世界捱得咁紧要，捱生捱死凄*凉、阴*功嘛。女怕嫁错郎，就怕嫁错村，一世流流长，嫁入条“村仔”，就好难有翻身之日嘞，点算呢。
如此这般，就形成咗当时嘅一种揾对象嘅审查视觉，一旦查到自己个女识咗个“村仔狗”，老窦老母就会如临大敌，觉得此事非同小可，弊弊都冇咁弊。想尽办法都要拆散佢哋。如果个女唔听话，就Call闹耶，几歹同佢死过，甚至恐吓话要同佢斩断关系。
嗰啲本身娘家系“大村乡”嘅女仔，如果最后嫁咗“村仔”，就会下下有“低人一等”嘅感觉，觉得畀人睇唔起好正常，一旦同娘家人或者同乡发生矛盾冲突，嗌交嗰阵，对方惯用一句“好嘅就唔使嫁出村啦，你！”就即刻可以点你死穴，你耶都唔敢耶一声，冇得反驳，头耷耷粒声冇得出。
有本事先至可以嫁返本村？嫁唔出、冇*用、冇人要，所以嫁出村？呢啲系咩*逻辑嚟嘎？原始？封建？落后？但系喺相当长嘅一段时间，噉样嘅地域歧视、择偶偏见，一直存在喺厚街老百姓嘅心里面，你出生在穷乡僻壤嘅“村仔”，就注定畀人戴有色眼镜睇你嘎啦。
而家时代唔同嘞，通婚无障碍，你话嫁去边度，出国都大有人在啦，边处仲会有人话你一定要嫁返隔篱屋嘅啫？当然啦，要想婚姻稳定，无论系边个年代，门当户对、三观一致，先至系择偶嘅必要条件啊嘛。
作者简介：王小女子，一个从小就热爱文学和音乐的小女子，个人